काठमाडौं । नेत्र विक्रम चन्द विप्लव नेतृत्वको नेकपाका नेता प्रकाश शाही आयोजना माग गर्दै एमसीएको कार्यालयमा पुगेका छन् ।
दाङको देउखुरी क्षेत्रमा प्रस्तावित धानखोला लमही सडकखण्ड चार लेनको बनाई दिनुपर्ने भन्दै नेता प्रकाश शाही सहितले एमसीए को कार्यालयमा पत्र बुझाएका हुन् । शाही विप्लव नेकपाका केन्द्रीय समदस्य हुन् । तर नेकपाले निर्वाचन आयोगमा दल दर्ताका लागि दिएको निवेदनमा भने शाहीको नाम केन्द्रीय समितिमा भने परेको थिएन् ।
केही समय अघि विप्लव नेतृत्वको नेकपा एमसीसी नेपालमा आवश्यक नभएको भन्दै विरोध गर्दै आइरहेको थियो । तर रोचक के छ भने अहिले विप्लव नेकपाका नेता शाहीले नै एमसीएको कार्यालयमा पत्र बुझाएर नै बाटो बनाइदिन भन्दै आग्रह गरेका हुन् । शाहीले बुझाएको ज्ञापनपत्रमा एमसीए नेपालले हाल उक्त सडक खण्डलाई २ लेनको रुपमा अगाडी बढाउन खोजेको भन्दै एमसीए कार्यालयलाई सडक खण्ड ४ लेनको बनाउनु पर्ने भन्दै आग्रह गरेका हुन् ।
उनले एमसिएको कार्यालयलाई सडकखण्ड २ लेनको बनाए आफूहरुले विरोध गर्ने भन्दै ४ लेनको नै बनाइदिन आग्रह गरेका छन् । हाल विप्लव नेतृत्वको नेकपाले आगामी फागुन २१ गते हुने प्रतिनिधिसभा निर्वाचनमा सहभागी हुने भन्दै निर्वाचन आयोगमा दल दर्ता समेत गरेको छ ।
पार्टी निर्वाचनमा जाने भएसँगै गाउँमा नेताहरुले आफ्नो क्षेत्रतिर सरकारी निकायसँग योजना माग गर्दै निवेदन दिइरहेका छन् । उनीहरुले यसरी प्रचार प्रसार गरेर आफूहरु निर्वाचन जाने र त्यसका लागि जनतालाई आफुहरुले योजना पारेको भनेर झुटो प्रचारबाजी गर्ने नयाँ शैली अपनाएको बुझिएको छ ।
स्मरण रहोस यस अघि विप्लव नेकपाले निर्वाचन बहिष्कार भन्दै तत्कालीन माओवादी केन्द्रका अध्यक्ष पुष्पकमल दाहाल प्रचण्डसहितका नेताहरुलाई बम समेत प्रहार गरेको थियो ।
