एजेन्सी । इरानी राष्ट्रपति इब्राहिम रइसी र विदेशमन्त्री हुसेन आमिरअब्दुल्ला हियान सवार हेलिकप्टर दुर्घटनामा परेको छ ।
इरानी समाचार संस्थाका अनुसार राष्ट्रपति रइसी पूर्वी अजरबैजान प्रान्तमा एक बाँध उद्घाटनपछि तबरेज सहरतर्फ प्रस्थान गर्दै थिए । इरानका गृहमन्त्री अहमद वाहीदिले राष्ट्रपति रइसी र विदेशमन्त्री हियान उक्त हेलिकप्टरमा सवार रहेको पुष्टि गरेका छन् ।
खराब मौसमका कारण हेलिकप्टर दुर्घटना भएको आशंका गरिएको छ । राष्ट्रपति रइसीसवार सहित तीन वटा हेलिकप्टरसँगै भएपनि २ वटा हेलिकप्टर भने सकुशल अवतरण भएको समाचारमा जनाइएको छ ।
हेलिकप्टरमा राष्ट्रपति रइसी र विदेशमन्त्री हियानसहित इरानका सर्वोच्च नेताका प्रतिनिधि अयोतल्लाह मोहम्मद अली अल हसम, इरानको पूर्वी अजरबैजान प्रान्तका गभर्नर मलिक रहमाती र अन्य धेरै व्यक्ति पनि सवार रहेको उल्लेख गरिएको छ ।
राष्ट्रपति रइसी सवार हेलिकप्टरले फोर्सल्याण्डिङ गरेको समेत स्थानीय सञ्चारमाध्यमहरुले जनाएका छन् । तर, यसको स्वतन्त्र पुष्टि भने भैसकेको छैन् । राष्ट्रपति रइसीको अवस्थाका विषयमा पनि स्पष्ट जानकारी आइसकेको छैन् ।
घटनास्थलमा उद्धार र राहत टोली पठाइएको र खोजी कार्य जारी रहेको जनाइएको छ ।
