काठमाडौं । प्रधानमन्त्री पुष्पकमल दाहाल ‘प्रचण्ड’ ले चौथो पटक विश्वासको मत पाएका छन् ।
प्रतिनिधिसभाको सोमबार बसेको बैठकमा भएको मत विभाजनमा प्रधानमन्त्री प्रचण्डले विश्वासको मत प्राप्त गरेका हुन् । बैठकमा प्रधानमन्त्री प्रचण्डले संविधानको धारा १०० को उपधारा २ बमोजिम विश्वासको मत लिन आजको बैठकमा प्रस्तुत गरेको प्रस्ताव बैठकले बहुमतले स्वीकृत गरेको हो ।
१६ महिने कार्यकालमा प्रधानमन्त्री प्रचण्डले यो चौथो पटक विश्वासको मत लिएका हुन् । मतदानमा सहभागी भएका १५८ जना सांसद मध्ये प्रधानमन्त्री प्रचण्डको पक्षमा १५७ मत परेको थियो भने १ मत तटस्थ रह्यो ।
प्रधानमन्त्री प्रचण्डलाई उनकै दल नेकपा (माओवादी केन्द्र) सहित सत्ता गठबन्धनमा रहेका अन्य दलहरु नेकपा (एमाले), राष्ट्रिय स्वतन्त्र पार्टी (रास्वपा), नेकपा (एकीकृत समाजवादी) र अशोक राईको नेतृत्वमा रहेको समाजवादी पार्टीले विश्वासको मत दिएका हुन् ।
संसद्को सबै भन्दा ठूलो दल नेपाली कांग्रेस भने मतदानमा सहभागी भएन् । उपप्रधान तथा गृहमन्त्री समेत रहेका रास्वपा सभापति रवि लामिछाने सहकारी ठगी प्रकरणमा जोडिएको र उनीमाथि छानबीन गर्न संसदीय समिति गठनको माग गर्दै आएको कांग्रेसले आजको बैठकमा वेल घेराउ गर्दै नाराबाजी गरेको थियो ।
प्रतिपक्षी दलको नाराबाजीका बाबजुत सभामुख देवराज घिमिरेले संसद्को कारबाही अगाडी बढाएका थिए । मत विभाजनपछि सभामुख घिमिरेले उक्त मत सुनाएसँगै प्रधानमन्त्री प्रचण्डले विश्वासको मत प्राप्त गरेको घोषणा गरे ।
जनता समाजवादी पार्टी नेपाल (जसपा) विभाजन भएपछि उपेन्द्र यादव पक्ष सरकारबाट बाहिरिनुको साथै समर्थत समेत फिर्ता लिएपछि प्रधानमन्त्री प्रचण्डले पुनः विश्वासको मत लिनु परेको हो । यस अघि प्रधानमन्त्री प्रचण्डले प्रधानमन्त्री पदमा नियुक्त भएपछि पहिलो पटक २०७९ पुस २६ गते विश्वासको मत लिएका थिए ।
सत्ता गठबन्धनमा फेरबदल भएपछि प्रधानमन्त्री प्रचण्डले २०७९ चैत्र ६ गते दोस्रो पटक, २०८० फागुन ३० गते तेस्रो पटक विश्वासको मत लिएका थिए । त्यस्तै उनले २०८० फागुन ७ (आज) चौथो पटक विश्वासको मत प्राप्त गरेका हुन् ।
