काठमाडौं । प्रधानमन्त्री पुष्पकमल दाहाल ‘प्रचण्ड’ ले गौतम बुद्धको त्याग, विचार र अभ्यास अनुकरणीय भएको बताएका छन् ।
गौतम बुद्धको २५६८ औं जन्मजयन्तीको अवसरमा आज एक शुभकामना सन्देश जारी गर्दै प्रधानमन्त्री प्रचण्डले बुद्धको दर्शन र विचारले अहिंसा, सद्भाव, मानव कल्याण र मानिसकै जीवनमा शान्तिको बाटो देखाएकोले उनका विचारहरू विश्वभरि लोकप्रिय र कालजयी रहन सकेका बताएका छन् ।
नेपालको भूमिमा जन्म लिएका शान्तिका अग्रदुत बुद्धले सम्पूर्ण मानव जातिको कल्याणको संकल्पसहित गृहत्याग गरी कठोर परिश्रमबाट बोधीज्ञान प्राप्त गरेको प्रसङ्ग महत्वपूर्ण रहेको प्रधानमन्त्री प्रचण्डले बताए । मानव जातिको सर्वाङ्गीण हित र शान्तिका लागि गौतम बुद्धले गरेको त्याग, लिनुभएको विचार र अभ्यास नेपालीहरूका लागि विशेष ऐतिहासिक गौरवका विषय भएको उनले बताए ।
बुद्धको दर्शन र शिक्षाप्रति गौरव गर्दै मानव जातिको हितका पक्षमा आपसी सद्भाव, सहकार्य एवं एकताका साथ अग्रसर हुनु नै बुद्धप्रति सच्चा सम्मान हुन जाने प्रधानमन्त्री प्रचण्डको भनाई रहेको छ ।
