काठमाडौं । प्रमुख प्रतिपक्षी दल नेपाली कांग्रेसले प्रधानमन्त्री पुष्पकमल दाहाल ‘प्रचण्ड’ को भारत भ्रमणबारे सदनलाई जानकारी गराउन माग गरेको छ ।
आज बसेको प्रतिनिधिसभाको बैठकमा बोल्दै नेपाली कांग्रेसका प्रमुख सचेतक रमेश लेखकले यस्तो माग राखेका हुन् । उनले विदेशमन्त्री समेत विदेश भ्रमणमा जाँदा सदनलाई जानकारी गराउनु पर्ने परम्परा रहेको स्मरण गराउँदै प्रधानमन्त्री पुष्पकमल दाहाल ‘प्रचण्ड’ को भारत भ्रमणबारे सदनलाई जानकारी गराउन माग गरे ।
उनले भने, “प्रधानमन्त्रीले बिर्सिनु भयो की ? प्रधानमन्त्री कुनै पनि भ्रमणमा जानु अगाडी सदनलाई जानकारी गराउनु पर्ने परम्परा छ । उहाँ एक हप्ता पहिले जानु भएको । फर्किएर आएको पनि पाँच दिन भैसक्यो । हामीले कुरेर बसेका थियौं । उहाँले जानकारी गराउनु भएन ।”
साथै राष्ट्रपति रामचन्दै पौडेलको विदेश भ्रमणबारे पनि सरकारले सदनलाई जानकारी गराउनु पर्ने प्रमुख सचेतक लेखकले बताए । प्रधानमन्त्री र राष्ट्रपतिको विदेश भ्रमणका विषयमा सदनलाई जानकारी गराउन सभामुखले सरकारलाई रुलिङ गर्नुपर्ने कांग्रेसको माग छ ।
यस अघि सत्तारुढ दल नेकपा (एमाले) का सांसद रघुजी पन्तले पनि प्रधानमन्त्रीले भारत भ्रमणबारे सदनलाई जानकारी गराउनु पर्ने माग राखेका थिए ।
