काठमाडौं । अख्तियार दुरुपयोग अनुसन्धान आयोगले ललितपुर महानगरपालिकाका मेयर चिरीबाबु महर्जनलाई बयानका लागि बोलाएको पत्र बुझाएको छ ।
प्रेस संयोजकको नियुक्ति र बाढी पीडितलाई रकम वितरण गरेको विषयमा बयान लिनका लागि अख्तियारले दुई छुट्टाछुट्टै पत्र मेयर महर्जनलाई पठाएको हो । अख्तियारका कर्मचारीले बिहिवार मेयर महर्जनको कार्यकक्षमै गएर दुई छुट्टा छुट्टै पत्र बुझाएको अख्तियार स्रोतले जनाएको छ ।
महानगरको कार्यपालिकाको बैठकको निर्णय विपरीत मेयर महर्जनले २०७७ सालमा धापाखेल क्षेत्रका बाढी पीडितलाई दुई लाख र डेढ लाख राहत दिएको भन्दै उजुरी परेपछि उनलाई बयानका लागि बोलाइएको अख्तियारले जनाएको छ । त्यस्तै प्रेस संयोजकको नियुक्तिको विषयमा पनि बयान लिन अख्तियारले उनलाई पत्र पठाएको हो ।
मेयर महर्जनलाई अख्तियारले असार २६ र २८ गते टंगालस्थित कार्यालयमा बयानका लागि उपस्थित हुन भनेको छ ।
