सुर्खेत । कर्णाली प्रदेशको मुख्यमन्त्रीमा नेकपा (एमाले) कर्णाली प्रदेश संसदीय दलका नेता यामलाल कँडेल नियुक्त छन् ।
प्रदेश प्रमुख तिलक परियारले नेता कँडेललाई मंगलबार कर्णाली प्रदेशको नयाँ मुख्यमन्त्रीमा नियुक्त गरेका हुन् । सत्ता गठबन्धनमा रहेका दल एमालेसहित नेकपा (माओवादी केन्द्र) र नेकपा (एकीकृत समाजवादी) का गरी जम्मा २३ जना सांसदले हस्ताक्षरसहित कँडेललाई मुख्यमन्त्री बनाउन दाबी पेस गरेका थिए ।
बहुमत सांसदहरुले कँडेललाई मुख्यमन्त्री बनाउन हस्ताक्षरसहित दाबी पेस गरेपछि प्रदेश प्रमुख परियारलाई कँडेललाई नयाँ मुख्यमन्त्रीमा नियुक्त गरेका हुन् । प्रदेश प्रमुखको कार्यालयले नवनियुक्त मुख्यमन्त्री कँडेलको पद तथा गोपनियताको शपथ ग्रहण भोली गर्ने जनाएको छ ।
यस अघि माओवादी केन्द्रका राजकुमार शर्मा कर्णालीको मुख्यमन्त्री थिए । केन्द्रमा सत्ता समिकरणमा आएको फेरबदलसँगै कर्णालीको मुख्यमन्त्री एमालेको भागमा परेपछि शर्माले बुधवार पदबाट राजीनामा दिएका थिए ।
