काठमाडौं । राष्ट्रिय सभाको उपाध्यक्षको लागि आज निर्वाचन हुँदैछ ।
उपाध्यक्षको निर्वाचनको लागि आज अपरान्ह्र १ः१५ बजे राष्ट्रिय सभाको बैठक आह्वान गरिएको छ । उपाध्यक्षको लागि मंगलबार दुई जनाको उम्मेदवारी दर्ता भएको छ ।
सत्ता गठबन्धनको तर्फबाट नेकपा (एमाले) की विमला घिमिरे र प्रमुख प्रतिपक्षी दल नेपाली कांग्रेसको तर्फबाट कांग्रसकी विष्णुदेवी पुडासैनीले उम्मेदवारी दर्ता गराएकी छन् ।
आजको बैठकमा एमालेकी घिमिरेलाई भगवती न्यौपाने र कांग्रेसकी पुडासैनीलाई दुर्गा गुरुङले राष्ट्रिय सभाको उपाध्यक्ष पदमा निर्वाचित गरियोस् भन्ने प्रस्ताव सभा समक्ष प्रस्तुत गर्ने कार्यसूची रहेको छ ।
त्यस्तै राष्ट्रिय सभाका अध्यक्ष नारायण दाहालले दुवै उम्मेदवारका प्रस्तावकहरुलाई पालैपालो निर्वाचित गरियोस् भन्ने प्रस्ताव प्रस्तुत गर्न दिनेछन् । त्यसपछि अध्यक्ष दाहालले दुवै प्रस्तावहरुलाई निणयार्थ प्रस्तुत गर्ने र जुन प्रस्ताव बहुमतले पारित हुन्छ । त्यही निर्वाचित हुने संघीय संसद सचिवालयले जनाएको छ ।
सत्ता गठबन्धनमा भएको फेरबदलसँगै राष्ट्रिय सभा उपाध्यक्ष एमालेको भागमा परेपछि तत्कालीन उपाध्यक्ष माओवादी केन्द्रकी उर्मिला अर्यालले पदबाट राजीनामा दिएपछि निर्वाचन हुन लागेको हो । सत्ता गठबन्धनमा बहुमत भएकाले उपाध्यक्षमा एमालेकी घिमिरे राष्ट्रिय सभाको उपाध्यक्ष निर्वाचित हुने निश्चितजस्तै छ ।
