काठमाडौं । संघीय संसद्को संसदीय सुनुवाइ समितिको बैठक आह्वान गरिएको छ ।
संसदीय सुनुवाइ समितिका सचिव समेत रहेका संसद्का महासचिव पदम प्रसाद पाण्डेयले समितिको बैठक साउन १४ गते सोमबार बिहान ११ बजे बस्ने गरी आह्वान गरिएको जानकारी दिए । प्रस्तावित निर्वाचन आयुक्त कृष्णमान प्रधानबारे संसदीय सुनुवाइ सकिएकाले उनलाई निर्वाचन आयुक्तमा अनुमोदन गर्ने वा नगर्ने भन्ने विषयमा निर्णय गर्नको लागि बैठक आह्वान गरिएको हो ।
संसदीय सुनुवाइ समितिमा विचाराधीन रहेका प्रधानमाथि नेपाल कानुन समाजमा कार्यरत महिलामाथि यौन शोषण गरेको आरोप छ । पीडित महिलाले समितिमा उजुरी दिनुको साथै संसदीय सुनुवाइ समितिमा आएर नै बयान समेत दिएकी थिइन् ।
प्रधानले भने ती महिलासँगको विवाद अदालतमा मिलाइसकेको बयान दिएका थिए । पैसा दिएर अदालतमा दायर पत्र फिर्ता गर्न लगाई प्रधानले मिलापत्र गरेका थिए । सोमबारको समितिको बैठकले प्रधानबारे निर्णय गर्नेछ ।
