काठमाडौं । ‘हेर्ने कथा’ को हराएका वर्षहरुका पात्र प्रकाश तामाङ ‘काले’ ले प्रधानमन्त्री केपी शर्मा ओलीसँग भेटेका छन् ।
प्रकाशले आज प्रधानमन्त्री ओलीसँग भेटवार्ता गरेका हुन । प्रधानमन्त्री ओलीले सामाजिक सञ्जाल फेसबुकमा प्रकाशसँगको फोटो सेयर गर्दै प्रकाश सँग भेट भएको जानकारी दिएका छन् ।
"प्रकाश तामाङ नागरिकता बनाएर आज साँझ भेट्न आउनु भयो । नागरिकता बनेपछि उहाँलाई अरु कुरामा पनि सहज हुन्छ। खुसी लाग्यो। शुभ रात्री," ओलीले सामाजिक सञ्जाल फेसबुकमा लेखेका छन् ।
‘हेर्ने कथा’ मा हराएका वर्षहरु शिर्षकमा प्रशारण भएको प्रकाशको कथा हेरेपछि प्रधानमन्त्री केपी शर्मा ओलीले प्रकाशको नागरिकताको विषयमा चासो दिएका थिए ।
प्रधानमन्त्री ओलीले प्रकाशको नागरिकताबारे तत्कालीन गृहसचिव एकनारायण अर्यालसँग समेत छलफल गरेको जानकारी दिएका थिए ।
हराएको ३५ वर्षपछि आफ्नो गाउँ र परिवार फेला पारेका प्रकाश तामाङ ‘काले’ ले हिजो घरमै नागरिकताको प्रमाणपत्र प्राप्त गरेका थिए। नागरिकता पाएपछि प्रकाशले बैंक खाता खोलेका छन् ।
