दाङ । नेपाली कांग्रेसका लुम्बिनी प्रदेश सांसद धनबहादुर केसी (डिबी) कारागार चलान भएका छन् ।
सांसद केसी आइतबार रुकुम जिल्ला अदालतमा पुगेर आत्मसमर्पण गरेका हुन् । आफैं जिल्ला अदालतमा उपस्थित भएका सांसद केसीलाई प्रहरीले जिल्ला अदालतको फैसला कार्यान्वयनका लागि थुनामा पठाएको हो ।
प्रदेश सांसद केसी आइबार आफैं जिल्ला अदालतमा उपस्थित भएको र अदालतको फैसला कार्यान्वयन वा तोकिएको सजाय भुक्तानी गर्नको लागि उनलाई कारागार पठाइएको जिल्ला प्रहरी कार्यालय रुकुम पूर्वका प्रहरी प्रमुख डिएसपी माधव माधव खरेलले जानकारी दिए ।
उनले भने, “उहाँ अदालतमा उपस्थित भएपछि सम्मानित जिल्ला अदालतको तोकिएको सजाय भुक्तानी गर्नको लागि कारागार चलान गरेको छ ।”
२०४८ साल असार ६ गते साविक रूकुम जिल्ला अदालतका तत्कालीन जिल्ला न्यायाधीश बमकुमार श्रेष्ठको एकल इजलासले श्रीमती सँगको अंश मुद्दामा किर्ते गरेको अभियोगमा केसीलाई दोषी ठहर गर्दै एक वर्ष कैद र दुई हजार जरिवाना तोकेको थियो । त्यस यता उनी फरार रहँदै आएका थिए ।
गत निर्वाचनमा सांसद केसी नेपाली कांग्रेसको तर्फबाट रुकुम पूर्व प्रदेशसभा क्षेत्र १ को ‘ख’ बाट निर्वाचित भएका थिए । उनीमाथि अवैध मार्ग हुँदै मानिस अमेरिका पठाउने काममा सक्रिय रहेको आरोप पनि थियो ।
यही भदौ १६ गते नेकपा (बहुमत) लुम्बिनी प्रदेश कमिटीले हत्या आरोपी मन्त्री बादशाह कुर्मी र फरार सांसद धनबहादुर केसीलाई बर्खास्तीको मागसहित लुम्बिनी प्रदेशको राजधानी दाङको देउखुरीमा जन प्रदर्शन गरेको थियो । साथै नेकपा (बहुमत) लुम्बिनी प्रदेशले कुर्मी र केसीलाई कारबाहीको माग गर्दै मुख्यमन्त्री चेतनारायण आचार्यलाई ज्ञापन पत्र बुझाउनेदेखि लुम्बिनी प्रदेशका प्रमुख जिल्ला अधिकारीहरूलाई ज्ञापन पत्र बुझाउनुका साथै चरणबद्ध आन्दोलन गर्दै आएको थियो ।
सांसद केसी कारागार चलान भएसँगै नेकपा (बहुमत) का केन्द्रिय सदस्य तथा दाङ जिल्ला इन्चार्ज नरेन्द्र विश्वकर्मा ‘चे’ ले आफूहरुले सुरु गरेको आन्दोलनले आंशिक सफलता प्राप्त गरेको बताएका छन् ।
उनले सामाजिक सञ्जाल फेसबुकमा लेखेका छन्, “हाम्रो आन्दोलन को आंशिक सफलता डिबि भनिने सांसद धन बहादुर केसि पक्राउ ।”
