काठमाडौं । उद्दारकर्ताको प्रतीक्षा गर्दा गर्दै ललितपुरको नखिपोटमा चार जना बेपत्ता भएको खुलेको छ ।
कान्तिपुर कोलोनी नजिकै रहेको टहरोमा बस्दै आएका चार जना बाढीका कारण शनिबार बिहानदेखि फसेका थिए । प्रत्यक्षदर्शी जीवन पोख्रेलका अनुसार, करिब ८ बजेदेखि उनीहरु टहरामाथि उद्धारको प्रतिक्षामा बसेका थिए ।
पोखरेलले आफूले सुरक्षा निकाय र महानगरपालिकाका अन्य निकायमा पनि खबर गरेको तर प्रहरी टोली आउन करिब ४५ मिनेट लागेको बताए । प्रहरी पनि दुई जना मात्र आएको र उनीहरुसँग उद्धारको लागि आवश्यक सामग्री पनि नभएको बताएका छन् ।
उद्धारमा आएका प्रहरीले डोरी किरेटमा बाँधेर फाले पनि टहरामाथि बसेका उनीहरुले टेकेको जस्ताको पाता नै बगाएपछि उनीहरुलाई पनि नख्खु बाढीले बगायो ।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार, बेपत्ता हुनेमा एक महिला, दुई पुरुष र एक जना बच्चा छन् । उनीहरुको खोजी भइरहेको उनले बताए । बेपत्ताको खोजीमा सशस्त्र प्रहरीको लाइफ बोट समेत परिचालन गरिएको उनले बताएका छन् ।
शुक्रबारदेखि परिरहेको अविरल वर्षाका कारण उपत्यकाका विभिन्न स्थानमा नदी बस्तीमा पसेको छ । शुक्रबार र शनिबार अत्याधिक वर्ष हुने भन्दै राष्ट्रिय विपद् न्यूनीकरण तथा व्यवस्थापन प्राधिकरणले पनि सूचना जारी गरेको थियो ।
उपत्यकामै उद्धारको तयारी कमजोर देखिएपछि हाल चौतर्फी रुपमा सरकारको आलोचना भैरहेको छ ।
