विराटनगर । ट्रकको ठक्करबाट साइकलयात्रीको मृत्यु भएपछि विराटनगर भन्सार कार्यालय (आईसीपी) परिसर तनावपूर्ण बनेको छ ।
भन्सार कार्यालय जाने सडकमा दुर्घटना भएर एक साइकल यात्रीको मृत्यु भएपछि आक्रोशित स्थानीयहरुले आन्दोलन गरेपछि अवस्था तनावपूर्ण बनेको हो । बिहिवार साँझ आईसीपी रोडमा ना. ४ ख २४८३ नम्बरको ट्रकले विराटनगर–१८ का अन्दाजी ६० वर्षीय साइकल यात्री श्याम साहलाई ठक्कर दिएको थियो ।
ट्रकले ठक्कर दिएपछि गम्भीर घाइते भएका साहलाई प्रहरी टोलीले उपचारको लागि विराट नर्सिङ होम पु¥याएको थियो । नर्सिङ होममा पु¥याउनासाथ चिकित्सकले उनलाई मृत घोषणा गरेका थिए । साहको मृत्युपछि आक्रोशित बनेका स्थानीयहरुले भन्सार कार्यालयलाई लक्षित गरेर शुक्रबार बिहान ढुंगामुढा प्रहार गरेका थिए ।
सडक साघुँरो हुँदा दुर्घटना बढेको भन्दै स्थानीयहरुले सडकको स्तरउन्नती हुनुपर्ने, मालवाहक सवारी सधानको गति सिमीत हुनुपर्ने, सडकमा रात्रिकालीन बत्तिको व्यवस्था हुनुपर्ने लगायतका मागहरु राखेर आन्दोलन गरिरहेका छन् । मृतक साहको शव अस्पतालमै रहेको छ । उनका परिवारका सदस्य र आफन्तले शव बुझ्न मानिरहेका छैनन् ।
दुर्घटना पछि ट्रक र चालक सुनसरीको बर्जु गाउँपालिका– ५ का ३० वर्षीय दीपक यादवलाई नियन्त्रणमा लिएर आवश्यक अनुसन्धान गरिरहेको प्रहरीले जनाएको छ ।
