काठमाडौं । दशैंका लागि घर फर्किने यात्रुहरुबाट तोकिएको भन्दा बढी भाडा लिने हाइसका सञ्चालकलाई प्रहरीले पक्राउ गरेको छ ।
काठमाडौंबाट पोखरा, दमौली, लमजुङ लगायतका जिल्लामा जाने हाइस चालकहरुले तोकिएको भन्दा बढी भाडा लिएको गुनासो आएपछि प्रहरीले कलंकी तथा बसपार्कमा अनुगमन गरेर बढी भाडा असुल्ने चालकहरुलाई नियन्त्रणमा लिएको हो ।
पक्राउ पर्नेमा ग १ ख ४४९९ नम्बरको हाइसका चालक डम्बरबहादुर आलेमगरसहित अन्य पाँच हाइसका चालक र सह—चालकहरु रहेका छन् । उनीहरुले एक यात्रुबाट एक हजार देखि २५ सय रुपैयाँ सम्म धेरै भाडा लिने गरेको पाइएको उपत्यका प्रहरी कार्यालय रानीपोखरीका प्रमुख एआईजी किरण बज्राचार्यले जानकारी दिइन् ।
बाढी/पहिरोको कारण देखाउँदै दशैंको समयमा कालोबजारी गर्ने तथा यात्रुहरुबाट तोकिएको भन्दा बढी भाडा लिने सवारी साधनलाई निगरानीमा राखेर पक्राउ गरी आवश्यक अनुसन्धान भैरहेको प्रहरीले जनाएको छ ।
