काठमाडौं । नेपाल कम्युनिष्ट पार्टी (बहुमत) ले मिटरब्याजीलाई कारबाही गर्न माग गर्दै प्रमुख जिल्ला अधिकारीलाई ज्ञापनपत्र बुझाएको छ ।
वित्तीय आतंक बन्द गर्न तथा मिटरब्याजीलाई कारबाही गर्न माग गर्दै दाङका प्रमुख जिल्ला अधिकारी कृष्ण प्रसाद लम्साललाई ज्ञापनपत्र बुझाएका हुन् । नेकपा (बहुमत) दाङका जिल्ला सेक्रेटरी अमर खड्का नेतृत्वको टोलीले शुक्रबार प्रमुख जिल्ला अधिकारी लम्साललाई ज्ञापनपत्र बुझाएको हो ।
बैंक तथा वित्तीय संस्थालाई एक अंक र स्थिर ब्याजदरमा कायम गर्नुका साथै जनताको घरबार जग्गा जमिन लिलाम नगर्न कडा व्यवस्था गर्नुपर्ने नेकपा (बहुमत) द्धारा बुझाइएको ज्ञापनपत्रमा उल्लेख गरिएको छ ।
दशैंको मौका छोपेर व्यवसायीहरुले जनताको ढाड सक्ने गरी चर्काे रुपमा मुल्य वृद्धि गरेकोले त्यसलाई पनि नियन्त्रण गर्नुपर्ने लगायतका माग ज्ञापनपत्रमा उल्लेख गरिएको छ । राज्य जनताको नभएको हुँदा जनताले दुःख पाइरहेका र अहिले आफूहरुले जनताको राज्य सत्ता बनाउनकै लागि संघर्ष गरिरहेको ज्ञापनपत्रमा उल्लेख गरिएको छ ।
नेकपा (बहुमत) ले प्रमुख जिल्ला अधिकारी लम्साललाई बुझाइएको ज्ञापनपत्रमा दलाल, तस्कर, भ्रष्टाचार, कालोबजारी, वित्तीय आतंकविरुद्ध नेकपा (बहुमत) ले जन–एकता अभियान सञ्चालन गरिरहेको पनि उल्लेख गरिएको छ ।
यस्ता छन नेकपा (बहुमत) दाङले प्रमुख जिल्ला अधिकारीलाई बुझाएका मागहरु:
१.सिमा तथा सवारी साधन, होटल रेस्टुरेन्ट लगायत अन्य उपभोग्य सरसामान किनमेलमा गरिने ठगी , पाकेटमार,ज्यादती, लुटपाट नियन्त्रण गरियोस् ।
२.गुणस्तरहिन तथा अखाद्य बस्तुको बिक्रीवितरण तथा उपभोगमा रोक लगाइयोस ।
३.कालोबजारी नियन्त्रणका लागि व्यापक बजार अनुगमन गरि कारवाहिको दायरामा ल्याइयोस ।
४.चाडवाडका नाममा हुने जुवातास, जाडरक्सी, लगायत सामाजिक हिंसालाई कडाइ गरियोस।
५.विभिन्न प्रकृतिका चोरी तस्करी, नदिनाला दोहन लगायतको कडा नियमन तथा नियन्त्रण गरियोस् । अबैध क्रसर हरु बन्द गरियोस।
६. वित्तीय आतंक रोक्न ठोस कदम चाल्नु पर्ने र मिटरव्याजिलाइ कार्वाही गरियोस् ।
७. दुषित मनसायका चेक तथा तमसुक खारेज गरियोस ।
८. सरकारी कार्यलय र कर्मचारिलाइ अनिवार्य स्वदेशी उत्पादन प्रयोग गर्न नीति बनाइयोस ।
९. बैंक तथा वित्तीय संस्थालाइ एक अंक र स्थिर व्याज दर कायम गर्नुका साथै जनताको जग्गा जमिन घरबास लिलाम नगर्न कडा प्राबधान राखियोस।
१०. लागुऔषधको किनबेच र प्रयोगमा कडाइ गरि कार्वाहीको गरियोस ।
११. चाडबाड लक्षित गरि सडक, सवारी साधन र सवारी चालक लाई व्यबस्थित गरियोस ।
१२. क्षमता भन्दा बढी यात्रु राख्ने, मापसे वा लापसे गर्ने , नियम भन्दा बढी भाडा लिने,तिब्र गतिमा चलाउने लगायतका क्रीयाकलाप रोकियोस ।
१३. कर छली , भन्सार चुहावट, न्युनबिजिकरण, गलत जाचपास गर्नेलाइ कारवाही गरियोस ।
