काठमाडौं । आईसीसी वुमन्स टी- २० विश्वकप क्रीकेट प्रतियोगितामा न्युजिल्यान्डले सेमिफाइनलमा स्थान सुरक्षीत बनाएको छ ।
गएराती भएको खेलमा न्युजिल्यान्डले पाकिस्तानलाई ५४ रनले पराजित गरेसँगै आफ्नो सेमिफाइनल यात्रा सुरक्षीत गरेको हो ।
जितका लागि १ सय ११ रनको लक्ष्य पछ्याएको पाकिस्तान ११.४ ओभरमा ५६ रन मात्र बनाएर अलआउट भयो । राम्रो नेट रन रेटको जितमा सेमिफाइनल प्रवेशका लागि पाकिस्तानसामु आक्रामक खेल्ने विकल्प मात्र थियो ।
न्युजिल्यान्डका लागि ओपनर सुजी बेट्सले सर्वाधिक २८ रन बनाइन् । पाकिस्तानका लागि भने कप्तान फतिमा सानाले सबैभन्दा बढी २१ रन जोडिन् । यो जितपछि न्युजिल्यान्ड समूह ए को दोस्रो स्थानमा रह्यो ।
लिग चरणका सबै खेल जितेको अस्ट्रेलिया शीर्ष स्थानमा रहेर यसअघि नै सेमिफाइनल पुगिसकेको छ । न्युजिल्यान्डको जितले भारतको अन्तिम चारमा प्रवेश गर्ने सम्भावना पनि समाप्त भएको थियो ।
समूह बी बाट सेमिफाइनल पुग्ने टिमको भने निर्णय हुन बाँकी छ ।
