काठमाडौं । नेपाल पञ्चाङ्ग निर्णायक समितिले यस वर्षको भाइटीकाको शुभ साइत सार्वजनिक गरेको छ ।
समितिका अनुसार भाइटीकाको शुभसाइत कात्तिक १८ गते बिहान ११ बजेर ३७ मिनेटमा रहेको छ । आजको बैठकले भाइटीकाको शुभ साइतबारे निर्णय गरेको कार्यकारी निर्देशक सूर्यप्रसाद ढुंगेलले जानकारी दिए ।
पश्चिम मोहोडा गरेर भाइटीका लगाउनुपर्ने समितिले जनाएको छ । नेवार समुदायले मनाउने किजा पूजा पनि त्यसै दिन गर्नुपर्ने जनाइएको छ । यस वर्षको यम पञ्चक तथा नेपालीको दोस्रो ठूलो चाँड तिहार कात्तिक १३ गते मंगलबारदेखि सुरु हुँदैछ ।
आयुर्वेदका प्रवर्तक धन्वन्तरीजयन्ती पनि बुधवार नै मनाइन्छ । कुकुर तिहार, नरक चतुर्दशी, दीपमालिका र लक्ष्मी पूजा पनि कात्तिक १५ गते बिहिवार मनाउनुपर्छ । औंशी कात्तिक १६ गते शुक्रबार परेको छ । त्यस दिन भने तिहारको कुनै पर्व नरहेको समितिले आज जारी गरेको विज्ञप्तिमा उल्लेख गरिएको छ ।
कात्तिक १७ गते शनिबार गोरु पूजा, गोवर्द्धन पूजा, बलि पूजा, हलि तिहार, म्हपूजा र नेपाल संम्वत् ११४५ पनि परेको छ । यसैगरी कात्तिक २२ गते बिहिवार छठ पर्व परेको पनि समितिले जनाएको छ ।
