काठमाडौं । नेपाल प्रहरीको केन्द्रीय अनुसन्धान ब्यूरो ‘सीआईबी’ ले नेपाली कांग्रेसका उपसभापति समेत रहेका पूर्वकानून मन्त्री धनराज गुरुङसँग बयान लिएको छ ।
सीआईबीले सहकारी ठगी प्रकरणको विषयमा अनुसन्धान गर्न गुरुङसँग बयान लिएको हो । सहकारी ठगी प्रकरणमा उपसभापति गुरुङको पनि नाम जोडिएपछि बुधवार सीआईबीले उपसभापति गुरुङसँग झण्डै चार घण्टा बयान लिएको हो ।
ललितपुरको मितेरी सहकारीमा बचतकर्ताको रकम अनियमितता भएको प्रकरणमा गुरुङकी पूर्वपत्नी ज्योती जोडिएकाले उनी पनि विवादमा परेका थिए । ज्योती उक्त सहकारीकी सञ्चालक थिइन् ।
ज्योतीसँग गुरुङको डिभोर्स भएपछि पनि उनले श्रीमतीको नाममा ऋण तिरिरहेको पाइएपछि गुरुङको भूमिकालाई शंकास्पद मानिएको थियो । यस सहकारी ठगी प्रकरणबारे छानबिन गर्न बनेको संसदीय छानबिन समितिले पनि कांग्रेस उपसभापति गुरुमाथि पनि अनुसन्धान गर्न सिफारिस गरेको थियो ।
