काठमाडौं । झाँक्री प्रकाश भुजेलको गाडीको ठक्करबाट घाइते भएका मोटरसाइकल चालकको मृत्यु भएको छ ।
मृत्यु हुनेमा मोटरसाइकल चालक कागेश्वरी मनहरा नगरपालिका-२ का २८ वर्षीय नारायण गरकोटी रहेका छन् ।
गाडीको ठक्करबाट गम्भीर घाइते नारायणको उपचारको क्रममा साझ ग्राण्डी अस्पतालमा मृत्यु भएको जिल्ला प्रहरी परिसर काठमाडौंका एसपी नवराज अधिकारीले जानकारी दिए।
आज दिउँसो साढे दुईबजेतिर शंखरापुर वडा नम्बर ९ इन्द्रायणी पुल नजिकै भुजेलले चलाएको बा ११ प २६९५ नम्बरको कारले बागमती प्रदेश ०२–०१८ प ६८७५ नम्बरको मोटरसाइकललाई ठक्कर दिएको थियो ।
भुजेलले चलाएको कारले मोटरसाइकललाई ठक्कर दिएर पसलको सटरमा समेत ठोक्किएको थियो । मोटरसाइकको पछाडि सवार नारायणकी ३२ वर्षीया श्रीमती किसानुमाया नगरकोटी पनि गम्भीर घाइते भएकी छिन । उनको पनि ग्राण्डी अस्पतालमा उपचार भैरहेको छ ।
मोटरसाइकललाई ठक्कर दिएर फरार रहेका गाडी चालक झाँक्री प्रकाश भुजेलले प्रहरीसमक्ष आत्मसमर्पण गरेका छन् ।
