काठमाडौं । प्रधानमन्त्री केपी शर्मा ओलीले मन्त्रीहरुको सक्षमता प्रभावकारी नदेखिए परिवर्तन हुन सक्ने चेतावनी दिएका छन् ।
चालू आर्थिक वर्षको नीति तथा कार्यक्रम र बजेट कार्यान्वयनको प्रथम त्रैमासिकको बुधवार बसेको समिक्षा बैठकमा प्रधानमन्त्री ओलीले सोचेजति काम नभएकोले प्रभावकारी रुपमा कार्य सम्पादन गर्न निर्देशन दिएका छन् ।
कुनै पनि मन्त्रीको कार्यसक्षमता प्रभावकारी नभए समीक्षा गर्नुपर्ने प्रधानमन्त्री ओलीको भनाइ थियो । प्रधानमन्त्री, मन्त्री र सचिवले सकारात्मक परिणामका लागि आफ्नो ठाउँबाट हस्तक्षेप गर्नुपर्ने र काम नगर्ने कर्मचारीलाई सरुवा मात्रै नगरेर कारबाही गर्नुपर्ने उनले बताए ।
‘प्रक्रियावादमा मात्रै नअल्झिऔँ । हामीले जनताका अपेक्षाबमोजिम ठोस र परिणाममूलक काम गर्न सक्नुपर्छ । देशमा रोजगारी र आम्दानी बढाउने नीति लिनुपर्छ,’ प्रधानमन्त्री ओलीले निर्देशन दिँदै भने, ‘काम नहुँदा निरीह भएर हेरेर मात्रै हुँदैन, अब के गर्ने भन्ने ठोस योजना मलाई चाहियो । हामी सरकारमा भएको उपादेयता हुनुप¥यो । हिम्मतिलो तरिकाले अगाडि बढौँ ।’
अब अल्याङटल्याङ गर्ने समय नभएको, मन्त्रीको कार्यसक्षमता प्रभावकारी नभए सोच्नुपर्ने बेला भएको र कर्मचारीले उत्साहका साथ काम गर्नुपर्ने समय रहेको बताए ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा उपप्रधानमन्त्री, मन्त्री, राष्ट्रिय योजना आयोगका पदाधिकारी, मुख्यसचिव र सचिवहरू सहभागी थिए ।
