काठमाडौं । नेपाल प्रिमियर लिग (एनपीएल) को विजेता टोलीले एक करोड ११ लाख रुपैयाँ पुरस्कार पाउने भएको छ ।
एनपीएलको उद्घाटन कार्यक्रममा विजेता टोलीले एक करोड ११ लाख रुपैयाँ पुरस्कार पाउने जानकारी गराइएको हो । आयोजकका अनुसार प्रतियोगितामा दोस्रो हुने टोलीले ५० लाख, तेस्रो हुनेले ३० लाख चौथो हुने टोलीले २० लाख रुपैयाँ पुरस्कार पाउने छन् ।
सिंगल राउन्ड रोबिनका आधारमा हुने एनपीएलमा लिग चरणमा कुल २८ खेल हुनेछ। लिग चरणपछि शीर्ष चारमा रहने टोली प्लेअफमा प्रवेश गर्नेछन्। जहाँ पहिलो र दोस्रो हुने टिमबीच पहिलो क्वालिफायर खेल हुनेछ। यस खेलको विजेताले सीधै फाइनलमा स्थान बनाउनेछ भने तेस्रो र चौथो हुने टोलीले एलिमिनेटर खेल खेल्नेछन्।
एलिमिनेटरमा पराजित हुने टोली बाहिरिँदा एलिमिनेटरको विजेता र पहिलो क्वालिफायरको पराजित टोलीबीच दोस्रो क्वालिफायर खेल हुनेछ। यसको विजेताले उपाधिका लागि प्रतिस्पर्धा गर्नेछ। एनपीएलको फाइनल खेल पुस ६ गते हुनेछ।
त्रिवि क्रिक्रेट मैदानमा एनपीएलको आज भएको उद्घाटन खेलमा विराटनगर किंग्स र जनकपुर बोल्ट्सबीच प्रतिस्पर्धा भैरहेको छ ।
