काठमाडौं । राष्ट्रिय स्वतन्त्र पार्टी (रास्वपा) ले पार्टी सभापति रवि लामिछानेलाई चितवनबाट पोखरा लाने क्रममा सरकारले निकृष्ट कार्य गरेको जनाएको छ ।
चितवनमा सहकारीको रकम अपचलनमा बयान सकिएपछि लामिछानेलाई बुधबार राति त्यहाँबाट पोखरा लगिएको थियो । सरकारको यस कार्यलाई रास्वपाले आश्रर्यजनक, निकृष्ट, निन्दनिय घटना भएको बताएको छ ।
सरकारको कार्यलाई रास्वपाले गैरन्यायिक चाल भएको टिप्पणी गरेको छ । सभापति लामिछानेको निजी डायरी हिरासतबाटै गाएब गरिएको रास्वपाले आरोप लगाएको छ ।
“सरकारको यो कर्मले नागरिकको नैसर्गिक मानवअधिकार हनन गरेको छ । यो निर्मम कदमको औचित्य राज्यले पुष्टि गर्नुपर्नेर्छ । यसतर्फ राष्ट्रिय मानवअधिकार आयोग एवं सम्पूर्ण राष्ट्रिय अनतर्राष्ट्रिय मानवअधिकारकर्मी तथा मानवअधिकारवादी संघ संस्थाहरुको गम्भीर ध्यानाकर्षण गराउन चाहान्छौं,” रास्वपाका कार्यवाहक प्रवक्ता मनिष झाद्धारा जारी गरिएको विज्ञप्तिमा उल्लेख गरिएको छ ।
सरकारको कार्य संविधानको धारा १८ र २२ तथा मुलुकी अपराध संहिता, २०७४, को दफा १६७ एवम् यातना र अन्य कु्रर अमानवीय वा अपमानजाक व्यावहार वा सजाय विरुद्धको महासन्धि १९८४ विपरित भएको रास्वपाको ठहर छ ।
उक्त विज्ञप्तिमा भनिएको छ, “आज सांसद रवि लामिछानेका माध्यमबाट दुई तिहाइको दम्भमा नेपालमा लोकतान्त्रिक व्यावस्थाई दलिय कुशासनको पञ्जामा पार्न राज्यसत्ता उद्धत रहेको छ ।”
