काठमाडौं । कतारका राजा शेख तामिम विन हमद अल थानी मंगलबार (भोली) नेपाल भ्रमणमा आउने भएका छन् ।
पहिलो पटक नेपालको भ्रमणमा आउन लागेका कतारी राजा थानीलाई स्वागत गर्न राष्ट्रपति रामचन्द्र पौडेल आफैं विमानस्थल जाने भएका छन् । राष्ट्रपति पौडेलले आफैं त्रिभुवन अन्तर्राष्ट्रिय विमानस्थल पुगेर राजा थानीलाई स्वागत गर्ने कार्यक्रम रहेको परराष्ट्र मन्त्रालयले जनाएको छ ।
थानी मंगलबार साँझ त्रिभुवन विमानस्थलमा आइपुग्ने कार्यक्रम रहेको छ । उनले राष्ट्रपतिको सरकारी निवास शितल निवासमा राष्ट्रपति पौडेलसँग द्धिपक्षीय भेट गर्ने छन् । त्यस्तै राजा थानले प्रधानमन्त्री पुष्पकमल दाहाल ‘प्रचण्ड’ सँग पनि भेटवार्ता गर्नेछन् ।
उनको स्वागतमा नेपाल सरकारले मंगलबार सार्वजनिक बिदा समेत दिएको छ । राजा थानी बुधवार स्वदेश फर्किने कार्यक्रम रहेको परराष्ट्र मन्त्रालयले जनाएको छ ।
