काठमाडौं । गृहमन्त्री रमेश लेखकले सहकारीको रकम अपचलन प्रकरणमा कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेको तस्बीर सार्वजनिक भएको विषयलाई छानबीन गरी कारबाही गर्न निर्देशन दिएका छन् ।
गृहमन्त्री लेखकले आईजीपी बसन्त बहादुर कुँवरलाई उक्त विषयमा छानबीन गरी दोषी जो सुकै भए पनि कारबाही गर्न निर्देशन दिएका हुन् । रास्वपाका कार्यकर्ताहरुले बुधवार साँझ सामाजिक सञ्जालमा हिरासत कक्षभित्रको तस्बीर भन्दै सार्वजनिक गरेपछि गृह मन्त्रालयले त्यस विषयमा छानबिन गरी दोषीमाथि कारबाही गर्न निर्देशन दिएको हो ।
गृहमन्त्री लेखकले उक्त तस्बीरको विषयमा छानबिन गरी दोषीलाई तत्काल कारबाहीका लागि प्रहरी प्रमुखलाई निर्देशन दिएको जानकारी दिए ।
उनले भने, “यो विषयमा छानबिन गरी दोषी जो सुकै भए पनि कारबाहीको दायरामा ल्याउन प्रहरी प्रमुखलाई निर्देशन दिएको छु । हिरासतमा रहेको दाबी गरिएको तस्बीरको विषयमा प्रहरीले अनुसन्धान गर्दैछ ।”
तस्बीर सार्वजनिक गरिएको विषयमा प्रहरीले आवश्यक अनुसन्धान गरिरहेको प्रहरी प्रवक्ता वरिष्ठ प्रहरी उपरीक्षक विश्व अधिकारीले बताए ।
