काठमाडौं । राष्ट्रिय स्वतन्त्र पार्टी (रास्वपा) का सभापति समेत रहेका सांसद् रवि लामिछानेको सांसद पद निलम्बित भएको छ ।
सहकारीको बचत अपचलन तथा सम्पत्ति शुद्धिकरणको कसुरमा समेत आइतबार अभियोगपत्र दर्ता भएपछि संसद् सचिवालयले लामिछानेको सांसद् पद निलम्बनमा परेको सूचना प्रकाशित गरेको हो ।
प्रतिनिधिसभाका महासचिव पद्यप्रसाद पाण्डेले सूचना प्रकाशित गर्दै ‘मुद्धाको किनारा नभएसम्म निलम्बन भएको मानिने’ कानूनी व्यवस्था अवगत गराएका छन् । लामिछाने चितवन क्षेत्र नम्बर २ बाट निर्वाचित सांसद् हुन् ।
जिल्ला सरकारी वकिल कार्यालय कास्कीले सम्पत्ति शुद्धिकरण, संगठित अपराध र सहकारीको बचत हिनामिना लगायतका तीन वटा मुद्धा दायर गरेको थियो ।
संविधानको धारा १०३ मा प्रतिनिधि सभाका कुनै सदस्य फौजदारी अभियोगमा पक्राउ परे सभामुखलाई तत्काल जानकारी गराउनुपर्ने व्यवस्था छ । सोही व्यवस्था अनुरुप आइतबार नै कास्की प्रहरीले संसद् सचिवालयलाई पत्र लेख्दै मुद्दा दर्ता भएको जानकारी गराएको थियो ।
लामिछाने गत २ कातिकमा काठमाडौंबाट पक्राउ परेका थिए । त्यसको जानकारी जिल्ला प्रहरी कार्यालयले त्यसबेलै गरेको थियो । जानकारी पाएपछि संघीय संसद् सचिवालयले लामिछाने पक्राउ परेको सूचना निकालेको थियो ।
