मोरङ । सहकारीको रकम हिनामिना गरेको आरोप लागेका उमागौरी कृषि सहकारी संस्थाका अध्यक्ष शम्भुप्रसाद रौनियारलाई जिल्ला अदालत मोरङले पुर्पक्षका लागि थुनामा पठाउने आदेश भएको छ ।
आइतबार जिल्ला अदालत मोरङका न्यायाधीश अरुण कुमार झाको इजलासले रौनियारलाई थुनामा राखेर मुद्दाको पुर्पक्ष गर्न आदेश दिएको हो । आदेश लगत्तै रौनियारलाई कारागार चलान गरिएको अदालतका सूचना अधिकारी हेमबहादुर बुढाथोकीले बताए ।
मोरङको धनपाल गाउँपालिका– ४ स्थित कर्षिया बजमारमा रहेको उमागौरी कृषि सहकारी संस्थाका बचतकर्ताहरुको करम अपचलन गरेको अरोप लागेका रौनियार सहकारीको कार्यालय बन्द गरेर फरार भएका थिए । माघ १४ गते उनी आफै अदालतमा हाजिर भएका थिए । उनलाई प्रहरीले जिल्ला प्रहरी कार्यालय मोरङको हिरासतमा राखेर अनुसन्धान अगाडी बढाएको थियो ।
रौनियारसँगै संघीय संसदको सार्वजनिक लेखा समितिका सभापति ऋषिकेश पोखरेलकी श्रीमती अञ्जना कोइरालासहित २६ जनालाई प्रतिवादी बनाएर मंसिर २७ गते सहकारीको रकम अपचलन सम्बन्धी मुद्दा अदालतमा दर्ता भएको थियो ।
गत पुस २४ गते अदालतमा उपस्थित भएकी अञ्जना कोइराला भने अदालतले धरौटीबापत मागेको १० लाख बुझाएर छुटेकी थिइन् । सोही सहकारीको रकम अपचल सम्बन्धीको एउटै मुद्दामा सहकारीका अध्यक्ष रौनियार भने आज पुर्पक्षका लागि कारागार चलान भएका छन् ।
