काठमाडौं । बालयौन दुरुपयोगको आरोपमा दोषी ठहर भएका मदन राईलाई अदालतले सजाय सुनाएको छ ।
जिल्ला अदालत खोटाङका न्यायाधीश नारायणप्रसाद दाहालको इजलासले शुक्रबार राईलाई २ वर्ष ६ महिना कैद सजाय र एक लाख जरिवाना तोकेको हो ।
त्यस्तै राईले पीडित राहत कोषमा समेत ४ हजार रुपैयाँ दाखिला गर्नुपर्ने छ । न्यायाधीश दाहालको इजलासले गत माघ १० गते राईलाई दोषी ठहर गरेको थियो ।
आफैंले सञ्चालन गरेको शुभम फाउन्डेसनमा अध्ययनरत बालिकालाई यौन दुरुपयोग गरेको अभियोगमा २०८० वैशाख २९ गते पक्राउ परेका राईलाई जिल्ला अदालत खोटाङबाट जेठ २२ गते चार लाख रुपैयाँ धरौटी बुझाएर छुटेका थिए । धरौटीमा छुटे पनि फाउन्डेसनमा जान भने राईलाई रोक लगाइएको थियो ।
