काठमाडौं । मधेश प्रदेशकी बिना विभागीय मन्त्री बेची लुंगेलीले श्रम तथा यातायात मन्त्रालयको जिम्मेवारी सम्हालेकी छन् ।
नेकपा (एकीकृत समाजवादी) बाट बिना विभागीय मन्त्रीको शपथ लिएकी बेची लुंगेलीले श्रम तथा यातायात मन्त्रालयको जिम्मेवारी सम्हालेकी हुन् । मुख्यमन्त्री सरोज कुमार यादवको सिफारिसमा गत बैशाख ६ गते प्रदेश प्रमुखले उनलाई बिना विभागीय मन्त्रीको शपथ गराएका थिए ।
मन्त्री लुंगेलीले आजै श्रम तथा यातायात मन्त्रीको शपथ लिएकी छन् । यस्तै माओवादी केन्द्रबाट बिना विभागीय मन्त्री बनेका माओवादी केन्द्र संसदीय दलका नेता भरतप्रसाद साहले अर्थमन्त्रालयको जिम्मेवारी लिने अडान गरेका छन् ।
मुख्यमन्त्री यादवले चौथों पटक विश्वासको मत लिँदा आफुलाई अर्थमन्त्रालयको जिम्मेवारी दिने वचन दिएकाले सो पूरा गर्नुपर्ने मन्त्री साहको भनाई छ । तर, यता मुख्यमन्त्री यादवले भने साहलाई वन तथा वातावरण मन्त्रालयको जिम्मेवारी दिन चाहेको छन् ।
मन्त्री साहले भने, “मुख्यमन्त्रीसँग छलफल भैरहेको छ । छिट्टै मन्त्रालयबारे टुंगो लाग्छ ।”
