काठमाडौं । नेपाली बजारमा सुनको मूल्यले नयाँ ऐतिहासिक रेकर्ड बनाएको छ । आज सुन प्रतितोला २ सय रुपैयाँले बृद्धि भएसँगै सुनको मूल्य हालसम्मकै उच्च भएको हो ।
नेपाल सुनचाँदी व्यवसायी महासंघका अनुसार आइतबार प्रतितोला एक लाख ४६ हजार ७ सय रुपैयाँमा कारोबार भएको छापालावा सुन आज प्रतितोला एक लाख ४६ हजार ९ सय रुपैयाँमै कारोबार भैरहेको छ ।
आइतबार प्रतितोला एक लाख ४६ हजार रुपैयाँमा कारोबार भएको तेजावी सुन आज एक लाख ४६ हजार २ सय मूल्यमा किनबेच भैरहेको छ । यस अघि शुक्रबार सुनको मूल्य हालसम्मकै उच्च मूल्यमा कारोबार भएको थियो । त्यस दिन सुन प्रतितोला एक लाख ४६ हजार ७ सय रुपैयाँमा कारोबार भएको थियो ।
आज चाँदीको मूल्य पनि प्रतितोला १० रुपैयाँले बढेको छ । सोमबार चाँदी प्रतितोला १ हजार ८८५ रुपैयाँमा किनबेच भैरहेको महासंघले जनाएको छ ।
