एजेन्सी । बंगलादेशकी पूर्वप्रधानमन्त्री शेख हसिनाविरुद्ध पक्राउ पुर्जी जारी भएको छ ।
बंगलादेशको एक अदालतले पूर्वप्रधानमन्त्री हसिनासहित उनको पार्टी आवामी लिगका पूर्व महासचिव ओबैदुर कादिर र अन्य ४४ जनाविरुद्ध पनि पक्राउ पुर्जी जारी गरेको छ । गत जुलाई र अगस्टमा बंगलादेशमा विद्यार्थीहरुले गरेको आन्दोलनलाई दबाउन हसिनाले बल प्रयोग गरेपछि सयौं विद्यर्थीहरुले मारिएका थिए ।
विद्यार्थी आन्दोलनले उग्र रुप लिएपछि तत्कालीन प्रधानमन्त्री हसिनाले देश छाडेर भारतमा शरण लिएकी थिइन् । हसिनाको १५ वर्षे शासन कालमा व्यापक रुपमा मानव अधिकार उल्लंघन, राजनीतिक विरोधीहरुलाई सामूहिक रुपमा हिरासतमा राख्ने, गैर न्यायिक हत्याहरु गर्ने जस्ता काम भएको लगायतका आरोप हसिना प्रशासनलाई लागेको छ ।
न्यायाधिकरणले न्यायिक प्रक्रियाको औपचारिक सुरुवातपछि बिहीबार पक्राउ पुर्जी जारी गर्दै हसिनालाई नोभेम्बर १८ सम्ममा हाजिर गर्नुपर्ने आदेश दिएको जनाइएको छ ।
आईसीटी अभियोजक बीएम सुल्तान महमुदले न्यायाधिकरणमा दुईवटा निवेदन पेस गरिएको बताए । उनका अनुसार पहिलो हसिनाका लागि पक्राउ पूर्जी र दोस्रो अन्य ४५ जनालाई पक्राउ पुर्जी जारी जारी गरिएको हो ।
पूर्वप्रधानमन्त्री हसिना बंगलादेशबाट भारत भागेपछि सार्वजनिक रुपमा देखिएकी छैनन् । ७७ वर्षीया हसिना भारतको राजधानी नयाँ दिल्ली नजिकैको सैन्य एयरबेसमा अन्तिम पटक देखा परेकी थिइन् ।
