काठमाडौं । सत्तारुढ गठबन्धनको नेतृत्व गरिरहेको दल नेकपा (एमाले) का अध्यक्ष समेत रहेका प्रधानमन्त्री केपी शर्मा ओलीको अभिव्यक्तिले वर्तमान सत्ता गठबन्धनमा भुइचालो ल्याइदिएको छ ।
प्रधानमन्त्री ओलीले यही बुधवार पार्टीको केन्द्रीय समितिको बैठकको समापन गर्ने क्रममा संविधानमा त्रुटी रहेको तर २०८७ मा संशोधन हुने भन्ने आशयको अभिव्यक्ति दिएपछि हालको सत्ता गठबन्धनमा हलचल प्रैदा भएको हो ।
प्रतिनिधिसभाको सबै भन्दा ठूलो दल नेपाली कांग्रेस र दोस्रो ठूलो दल नेकपा (एमाले) सहित अन्य दलहरु मिलेर वर्तमान सरकारको गठन भएको हो । एमाले र कांग्रेसबीच सरकार गठनका लागि भएको ७ बुँदे सहमति पत्रमा नै संविधान संशोधनको विषय मुख्य एजेण्डाको रुपमा रहेको थियो । दुई दलबीच भएको ७ बुँदे सहमतिपत्रको महत्पूर्ण बुँदा संविधान संशोधन नै प्रधानमन्त्री ओलीले २०८७ तिर हुने भनेपछि सरकारलाई समर्थन गरिरहेको दल नेपाली कांग्रेसमा सहित राष्ट्रिय राजनीतिमा अहिले चर्चाको विषय बनेको छ ।
यस्तो थियो एमाले केन्द्रीय समिति बैठकको समापनमा ओलीले दिएको अभिव्यक्ति, “हामी अहिले पनि संविधान संशोधन गर्न चाहिने दुई तिहाइ जुटाउने पक्षमा छौँ । तर राष्ट्रिय सभाका कारण सम्भव भइरहेको छैन । संविधान संशोधन त गर्ने नै हो । तर ०८७ मा ।”
एमाले, कांग्रेसबीच सरकार गठन भएपछि आफूले २ वर्षे कार्यकाल चलाउने र त्यसपछि आफूले राजीनामा नेपाली कांग्रेसका सभापति शेरबहादुर देउवा प्रधानमन्त्री बन्ने भन्ने अभिव्यक्ति सार्वजनिक रुपमै दिँदै आएका प्रधानमन्त्री ओलीले एक्कासी ७ बुँदे सहमतिको महत्पूर्ण बुँदा नै ०८७ तिर संशोधन हुने भनेपछि वर्तमान सत्ता गठबन्धनमा खटपट सुरु भएको सहजै अनुमान लगाउन सकिन्छ ।
नेपाली कांग्रेसका केन्द्रीय सदस्य एनपी साउँदले प्रधानन्त्री ओलीको अभिव्यक्तिले सत्ता गठबन्धनको पिल्लर हल्लिएको बताएका छन् । आज नेपाली कांग्रेस कपिलवस्तुले आयोजना गरेको एक कार्यक्रमलाई सम्बोधन गर्दै नेता साउले नेपाली कांग्रेस र एमाले मिलेर सरकार बनाउँदा पनि राजनीतिक स्थिरता हुन नसकेको बताए ।
उनले भने, “संविधान संशोधनको कुरा थियो । केही दिन अगाडी प्रधानमन्त्रीको अभिव्यक्ति आएको छ । तर, ७ बुँदे सहमतिको महत्वपूर्ण बुँदा २०८७ तिर संशोधन हुने भन्ने कुराले अहिले पिल्लर हल्लिएको छ । त्यो पिलर हल्लियो भनेपछि दुई दलबीचको सहमति पनि हल्लीएको छ । गठबन्धनको पिल्लर पनि हल्लीएको छ ।”
नेपाली कांग्रेसका नेता साउदले प्रधानमन्त्री ओलीको अभिव्यक्तिले गठबन्धनको पिल्लर हल्लीएको बताए पनि कांग्रेसका महामन्त्री गगन कुमार थापाले भने वर्तमान सत्ता गठबन्धन तीन वर्षसम्मै जाने दाबी गरेका छन् ।
यता प्रमुख प्रतिपक्षी दल नेकपा (माओवादी) केन्द्रका अध्यक्ष पुष्पकमल दाहाल ‘प्रचण्ड’ ले हिजो यो अप्राकृतिक भएकाले अब एमाले अध्यक्ष केपी शर्मा ओली नेतृत्वको सरकार नचल्ने अभिव्यक्ति दिएका थिए । उनले भने, “यो गठबन्धन अप्राकृतिक,अलोकतान्त्रिक र अपादर्शी छ भनेर मैले गम्भीर रुपले भनिसकेको छु।अप्राकृतिक भएकाले अब यो चल्दैन।”
नेकपा (एकीकृत समाजवादी) का अध्यक्ष माधव कुमार नेपालले प्रधानमन्त्री केपी शर्मा ओलीले चुनावै नगरी बस्न खोजेको आरोप लगाए । अध्यक्ष नेपालले केही दिन अघि नेपाली कांग्रेसका सभापति शेरबहादुर देउवासँग भेटवार्ता गरेको बताइएको छ । प्रतिपक्षी नेकपा माओवादीका अध्यक्ष प्रचण्ड, एकीकृत समाजवादीका अध्यक्ष नेपाल र राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनबीच भेटवार्ता भएको थियो ।
यसरी पछिल्लो दिनमा प्रधानमन्त्री ओलीको संविधान संशोधन सम्बन्धीको अभिव्यक्ति र प्रतिपक्षी दलका नेताहरुले कांग्रेसका शिर्ष नेतृत्वहरुसँग गरिरहेको भेटवार्ता र छलफलले वर्तमान सत्ता गठबन्धन परिवर्तन त हुन लगेको हैन विषयको चर्चा सुरु भएको छ ।
