काठमाडौं । चर्चित बालगायक सचिन परियारको निधन भएको छ । उपचारको क्रममा बिहीबार बिहान १०:४५ बजे त्रिवि शिक्षण अस्पतालमा उनको निधन भएको अस्पतालले जनाएको छ ।
१५ वर्षीय सचिनको केही दिनदेखि आईसीयूमा उपचार भइरहेको थियो । अघिल्लो वर्षदेखि नै स्वास्थ्य समस्याका कारण थलिएका उनको कम्मरमुनिको भाग राम्रोसँग चल्दैन थियो । यसअघि शल्यक्रिया गरेर तंग्रिएका सचिन आफ्नै बलमा उभिन नसक्ने अवस्थामा थिए ।
भाइरल बाल गायकका रुपमा परिचित सचिनको स्वरमा रेकर्ड भएको पहिलो गीत हो, ‘ओठ खोलेर’ । तीन वर्षअघि रेकर्ड भएको यो गीत १ करोड ९० लाखभन्दा बढीले युट्युबमा हेरेका छन् । त्यसपछि उनले ‘रातो रबर एक’, ‘रुमाल खस्छ कि’, ‘के छ र हजुर’लगायत दर्जनभन्दा बढी गीत गाए ।
अभिनेता राजेश हमालसँग एक म्युजिक भिडियोमा अभिनय गरे । हास्य शृंखला ‘मेरी बास्सै’का केही भागमा अभिनय समेत गरेका थिए । उनको भोलि पशुपति आर्यघाटमा अन्त्येष्टि गरिनेछ ।
