काठमाडौं । काठमाडौँ महानगरपालिकाका प्रमुख प्रशासकीय अधिकृत सरोज गुरागाई कार्य कक्षमा प्रवेश गरेका छन्।
काठमाडौँ महानगरपालिकाका अवरोधका बीच महानगरका कर्मचारी र वडा अध्यक्षहरुले प्रमुख प्रशासकीय अधिकृत गुरागाईलाई कार्यकक्षमा प्रवेश गराएका हुन् ।
अधिकृत गुरागाईलाई कार्यकक्षमा प्रवेश गराउने तयारी पश्चात् ढोकामा महानगर प्रहरीहरू तैनात गरिएको थियो। महानगरका अन्य कर्मचारी र वडा अध्यक्षहरुले नगर प्रहरीलाई ठेलमेठेल गर्दै ढोका फोरेर प्रमुख प्रशासकीय अधिकृत गुरागाईलाई कार्यालयमा प्रवेश गराएका हुन् ।
प्रशासकीय अधिकृत गुरागाईलाई कार्यालय प्रवेश गराउनु अघि उनको कार्यकक्षमा ताला लगाइएको थियो । उनलाई कार्यकक्षमा प्रवेश गराउन लागेका केही कर्मचारी र वडाध्यक्षहरुले उक्त कार्यालयमा लगाइएको ताल्चा फोड्ने क्रममा ढोकाको सिसा समेत फुटेको छ । यसरी ढोकासमेत तोडेर तालछाप फोडिएपछि गुरागाई कार्यकक्षमा प्रवेश गरेका छन्।
प्रमुख प्रशासकीय अधिकृत गुरागाईको स्वागतमा काठमाडौँ महानगरपालिकाकी उपमेयर सुनिता डंगोल पनि उपस्थित भएकी थिइन् ।
काठमाडौँ टावरको नक्सा पास सम्बन्धी विषयमा विवाद उत्पन्न भएपछि काठमाडौँ महानगर र प्रमुख प्रशासकीय अधिकृत टसल परेको थियो। यही कारणले महानगरले गुरागाईलाई कार्यालय प्रवेशमा रोक लगाएको थियो।
महानगरपालिकाका मेयर बालेन्द्र शाह बालेनले संघीय मामिला तथा सामान्य प्रशासन मन्त्रालयलाई नयाँ प्रमुख प्रशासकीय अधिकृत पठाइदिन आग्रह गरेका थिए। यता मन्त्रालयले भने गुरागाईंलाई नै काममा लगाउन आग्रह गर्दै आएको थियो।
मेयर बालेनले गुरागाईलाई काममा नलगाउने अड्डी लिएपछि यो विवाद उत्पन्न भएको हो। महानगरपालिका प्रमुख प्रशासकीय अधिकृत विहिन बनेपछि सागरमा कार्यरत कर्मचारीहरूको तलब समेत रोकिएपछि कर्मचारीहरुले आज प्रमुख प्रशासकीय गुरागाईंलाई कार्यकक्षमा हाजिर गराउने तयारी गरेका हुन्। कर्मचारीहरूको यस्तो तयारीपछि गुरागाईंलाई रोक्न मेयर बालेनले नगर प्रहरी तैनाथ गराएपछि विवाद बढेको हो ।
