काठमाडौं । आईसीसीले टी– २० विश्वकप २०२६ बाट बंगलादेशलाई हटाएर स्कटल्लयाण्डलाई खेलाउने निर्णय गरेको छ ।
बंगलादेश क्रिकेट बोर्ड (बीसीबी) ले भारतमा खेल्न अस्वीकार गरेपछि आईसीसीले बंगलादेशलाई प्रतियोगिताबाट हटाएर स्कटल्याण्डलाई खेलाउने निर्णय गरेको हो । बीसीबीले निरन्तर बंगलादेशले भारतबाहिर श्रीलंकामा खेल सार्नुपर्ने अडान लिएको थियो ।
यता आईसीसीले विश्वकपको निर्धारित तालिका परिवर्तन गर्न नसक्ने बताएपछि अन्तत बंगलादेश विश्वकपबाटै बञ्चित भएको हो । बिहिवार बीसीबीले भारतमा खेल्न नजाने निर्णय गरेपछि आईसीसीको बोर्ड बैठकले भारतमा खेल्न नजाने बंगलादेशलाई हटाएर अर्काे देशलाई सहभागी गराउने निर्णय गरेको थियो ।
अब बंगलादेश आउट भएपछि युरोप छनोट पार गर्न नसकेको स्कटल्याण्डले विश्वकप खेल्ने अवसर पाउनेछ । बंगलादेश नखेल्ने भएपछि आईसीसीले विश्वकप खेल्ने देशबाहेक माथिल्लो वरियतामा रहेको स्कटल्याण्डलाई अवसर दिएको हो ।
इन्डियन प्रिमियर लिग (आईपीएल) को कोलकाता नाइट राइडर्सले बंगलादेशका खेलाडी मुस्ताफिजुर रहमानलाई टोलीबाट हटाएपछि सुरु भएको विवादले बंगलादेश भारतमा क्रिकेट खेल्न नजाने अवस्थामा पुगेको हो । यो घटनापछि भारतीय क्रिकेट बोर्ड र बीसीबीबीच तनाब बढेको थियो ।
यो विवादले बंगालादेश सरकारले आईपीएल प्रसारणमै प्रतिबन्ध लगाएको छ ।
